Gamlestova på Kjøsneshogen er omkransa av gravhaugar. Nettop dit går sogelaget si neste kulturvandring – søndag 6. september. Den dagen får interesserte sjansen ei historisk vandring til staden der det budde folk for nesten 2000 år sidan.
Kulturhistorie. Første søndag i september opnar Johannes Kjøsnes og dottera Ragnhild dørene
i den over 100 år gamle stova på Kjøsneshaugen. Foto: Svein Heggheim
Klokka 12.00 ønskjer Johannes Kjøsnes og dottera Ragnhild velkommen i tunet heime på Kjøsnes. Derfrå går turen nokre hundre meter til gamlestova på Kjøsneshogen. Det vel 100 år gamle bygget er omkransa av fem-seks gravhaugar. To av dei er utgravne og avdekka spor av busetnad for mellom 1500 og 2000 år sidan.
Byr på rømask og potetkaker
Johannes tek oss meg tilbake i historia om Kjøsneshogen og gardsdrifta på Kjøsnes. Ragnhild tok over bruket i 2023, og satsar som heiltidsbonde med sju Vestlandsfe i fjøsen. Ho fortel om si satsing – som har mange likskapsteikn med landbruksdrift på 1970-talet. Viktige stikkord er produksjon av rømask og surmjølk.
Og denne søndagen får dei som vil kjøpe og nyte god gammaldags rømask og potetkaker – laga av vertskapet.
Festplass. Fram til 1919 fungerte dette som hovuhus på gardsbruket på Kjøsnes.
Foto: Svein Heggheim
Festplass for familien
Den over 100 år gamle stova er ein attraksjon i seg sjølv, og står slik den gjorde då den fungerte som hovudhus på gardsbruket. I 1919 stod nytt hus klart, og gamlestova vart riven og flytta til Kjøsneshogen. Trygve Bydal kjøpte den i 1926, og familien kjøpte den tilbake i 1986.
– I dag funger den som festplass for familien, seier Johannes.
Dette bygget er frå midten av 1800-talet. Her vil Ragnhild Kjøsnes
starte produksjon av brunost. Foto: Svein Heggheim
Satsar på osteproduksjon
Eit langt steinkast unna finn vi også eitt av dei eldste meieribygga i Jølster. Bygget stod opphavleg på ein husmannsplass nær vatnet, og vart reist midt på 1800-talet. Plassen vart seinare fråflytta og husa rivne, men dette bygget fungerte som meieri for bruka på Kjøsnes nokre år rundt 1930. Seinare vart det flytta til Kjøsnesfjorden før det vart flytta «heim» til Kjøsnes for rundt 20 år sidan. No har Ragnhild konkrete planar om å starte brunostproduksjon i bygget.
